Финската „Нокиа“ денес соопшти дека во вториот квартал остварила оперативен профит поголем од очекуваниот, благодарение на силната побарувачка на клиентите за вештачка интелигенција и cloud computing, поради што ја зголемила својата прогноза за целата година.
Споредливиот оперативен профит се зголемил за 18 проценти на 434 милиони евра, што ја надминало просечната проценка на аналитичарите од 382 милиони евра, според податоците на компанијата и анкетите на агенцијата LSEG, објави „Ројтерс“.
Дали вештачката интелигенција е нејзиниот нов адут?
Приходите од продажба достигнаа 4,82 милијарди евра, исто така над очекувањата на пазарот.
Во последниве години, Нокиа го фокусираше својот бизнис на снабдување со оптичка мрежна опрема за големи технолошки компании кои градат центри за податоци за вештачка интелигенција (ВИ).
Приходите од клиентите во секторот за ВИ и cloud computing се дуплираа во вториот квартал на 446 милиони евра, додека вредноста на новите нарачки изнесуваше 2,8 милијарди евра.
Големото враќање е тука, но има и предизвици
Извршниот директор на Нокиа, Џастин Хотард, рече дека побарувачката останува многу силна, но ограничувањата во синџирот на снабдување остануваат голем предизвик, поради што клиентите сè повеќе се одлучуваат за долгорочни договори за опрема.
Сепак, компанијата предупреди дека, како и другите производители на телекомуникациска опрема, е погодена од зголемувањето на цените на мемориските чипови поради силната побарувачка од секторот за вештачка интелигенција.
Не е само „Нокиа“ таа што предупредува на зголемување на трошоците
Минатата недела, шведскиот „Ериксон“ исто така предупреди дека зголемувањето на трошоците за чипови врши притисок врз маржите на профит.
„Нокиа“ ја зголеми својата прогноза за споредлива оперативна добивка за целата 2026 година на помеѓу 2,1 и 2,6 милијарди евра, во споредба со претходно проектираниот опсег од 2 до 2,5 милијарди евра.