По речиси три години штрајк, шведскиот синдикат IF Metall ја откажа индустриската акција против Tesla, објавувајќи дека американската компанија им платила на сите членови на синдикатот кои учествувале во протестот, наместо да потпише колективен договор.
Штрајкот започна на 27 октомври 2023 година, кога механичарите во 10 сервисни центри на Тесла во седум шведски градови престанаа да работат поради одбивањето на компанијата да прифати колективен договор, кој е основа на шведскиот модел на пазарот на трудот.
„Тесла е толку против колективното договарање што имплати на членовите на синдикатот наместо да се согласи на преговори“, рече Симон Петерсон, секретар за преговори во IF Metall.
Синдикатот објави дека на 19 август официјално ќе ги прекине сите дејствија против компанијата, пренесува АФП.
Тесла не попушти
За време на конфликтот, IF Metall постојано го прошири штрајкот на други услуги кои одржуваат возила на Тесла, а му се придружија речиси десет други синдикати, вклучувајќи поштенски и пристанишни работници. Конфликтот делумно се прошири и во други нордиски земји.
И покрај ова, Тесла не го промени својот став. Во септември 2025 година, Шведската канцеларија за помирување во работни спорови се откажа од медијацијата, оценувајќи дека сите можности за договор се исцрпени.
Според специјализираното списание Vi Bilägare, повеќето сопственици на возила на Tesla не почувствувале големи последици за време на штрајкот, а компанијата продолжила редовно да продава автомобили.
Маск се спротивставува на синдикално организирање
Извршниот директор на Tesla, Илон Маск, со години се спротивставува на синдикализацијата на вработените, од кои компанијата моментално има повеќе од 100.000 низ целиот свет.
Шведската подружница на Tesla тврди дека нејзините вработени имаат „еднакви или подобри услови за работа“ од оние предвидени во колективните договори.
Иако штрајкот траел речиси три години и прераснал во еден од најголемите работни спорови во поновата шведска историја, тој завршил без колективен договор – што аналитичарите го сметаат за важна победа за глобалната стратегија на Tesla за отфрлање на синдикално организирање.
