Познатиот италијански производител на автомобили „Масерати“ влегува во сосема нова деловна област.
Наместо луксузни автомобили, овој пат тој го претстави својот проект за недвижности – ексклузивен остров во Дубаи, кој ќе има 840 престижни резиденции, приватни базени, плажи, марина, па дури и пловечки италијански ресторан.
Проектот, наречен „Остров Масерати“, беше претставен на 9 ноември во соработка со компанијата за недвижности „Самана Колекта“. Островот ќе биде дел од архипелагот „Светски острови“, недалеку од брегот на Дубаи. Тоа е првиот проект на „Масерати“ наменет за целогодишен живот. Се очекува првите резиденции да бидат завршени во 2030 година.
Според презентираните планови, островот „Масерати“ ќе се состои од вкупно 840 резиденции дизајнирани во препознатливиот стил на италијанскиот производител на автомобили. Комплексот ќе биде поделен во три категории: обични луксузни резиденции, седум вили над водата и две вили сместени меѓу врвовите на дрвјата.