Европската Унија регистрираше трговски дефицит од 16,8 милијарди евра во септември оваа година, откако имаше суфицит од 11,4 милијарди евра во истиот месец минатата година, покажуваат најновите податоци на Евростат. Во еврозоната дефицитот изнесуваше 10,3 милијарди евра, додека една година претходно беше остварен суфицит од 13,5 милијарди евра.
Извозот на стоки од ЕУ во земјите надвор од Унијата се зголеми во септември за 4,7 проценти, на 240,1 милијарди евра, додека увозот порасна значително побрзо, за 17,9 проценти, на 256,9 милијарди евра. Во Еврозоната, извозот достигна 272,7 милијарди евра, што е раст од шест проценти, додека увозот се зголеми за 16,1 процент, на 283 милијарди евра.
Најголем придонес за влошувањето на трговскиот биланс имаше енергетскиот сектор. Трговскиот дефицит на ЕУ во енергетиката се зголеми од 24,1 милијарди евра во септември минатата година на 37,6 милијарди евра оваа година. Во исто време, суфицитот во трговијата со машини и возила се намали од 13,1 милијарди на 3,3 милијарди евра.
Во трговијата со Кина, дефицитот на ЕУ достигна 41,7 милијарди евра, во споредба со 35,2 милијарди во септември 2025 година. Извозот на европски стоки на кинескиот пазар се намали за 1,4 проценти, додека увозот од Кина се зголеми за 12,2 проценти. Спротивно на тоа, ЕУ оствари суфицит од 10,9 милијарди евра со Соединетите Американски Држави и 18,7 милијарди евра со Велика Британија.
Во првите девет месеци од 2026 година, ЕУ забележа трговски дефицит од 83,2 милијарди евра, по суфицит од 85,5 милијарди евра во истиот период минатата година. Во тој период, Еврозоната имаше дефицит од 36,5 милијарди евра, додека во првите девет месеци од 2025 година оствари суфицит од 102,2 милијарди евра. Податоците се однесуваат на трговијата со стоки со земји надвор од Европската Унија.