Само 200 од 5.300 вработени во Антропик не се милионери

IPO-то на Anthropic претвори многу од нејзините вработени во милионери, а стотици од нив во сопственици на средства вредни повеќе од 100 милиони долари.

Според податоците од регулаторните документи, компанијата имала 5.300 вработени во септември, а откако цената на акциите во првичната јавна понуда била поставена на 83 долари, околу 600 вработени имаат средства вредни повеќе од 100 милиони долари.

Акции вредни над 10 милиони долари се во сопственост на приближно 2.800 вработени, додека приближно 5.100 вработени, или 96 проценти од вкупниот број, имаат акции вредни најмалку еден милион долари. Ендру Бенсон, основачот на Hill.com, која ја следи вредноста на акциите на приватните компании, истакна дека е особено изненадувачки колку брзо е создадено толку многу богатство.

Во Силиконската долина, вообичаено е технолошките стартап компании да им плаќаат на вработените со комбинација од плата и акции, чија вредност може значително да се зголеми откако компанијата ќе се продаде или ќе стане јавна. Таквиот модел ги охрабрува вработените да останат во компанијата и да учествуваат во нејзиниот развој. Anthropic, сепак, растеше многу побрзо од повеќето стартапи.

Компанијата е основана во 2021 година, а на крајот на 2024 година имала помалку од 1.000 вработени. Според Бенсон, времето на пристигнување во фирмата е често поважно за крајната финансиска корист отколку позицијата во хиерархијата. Така, вработените кои се приклучија во 2023 или 2024 година можат да постигнат поголемо богатство од менаџерите кои се приклучија на почетокот на оваа година.

За споредба, IPO-то на SpaceX во јуни, по повеќе од две децении работење како приватна компанија, создаде околу 4.400 милионери меѓу своите 22.000 вработени. Сепак, Anthropic им дозволи на одредени вработени кои не се основачи да продадат дел од акциите веќе на првиот ден од тргувањето, што не е вообичаена практика за време на првичните јавни понуди.

Додека вработените во повеќето компании мора да чекаат од три до шест месеци пред да продадат акции, Anthropic воведе сложен распоред на ограничувања што им овозможи на инсајдерите веднаш да продадат до десет проценти од своите акции. Не е познато колку вработени ја искористија оваа можност.

За разлика од SpaceX, чии вработени се распоредени низ неколку држави, Anthropic ги концентрираше повеќето од своите вработени во Сан Франциско.

Новите милионери би можеле дополнително да го зголемат притисокот врз пазарот на недвижности таму, каде што цените веќе растат со најбрзо темпо во последните години. Просечната куќа во Сан Франциско се продаде за 1,7 милиони долари во октомври, што е зголемување за речиси 19 проценти во однос на претходната година. Во исто време, средната цена на куќата во САД остана речиси непроменета, на околу 416.700 долари.