Акциите на Дојче банк рано во вторникот паднаа за 1,8 отсто по блок-продажбата на околу 16 милиони акции во најголемата германска банка, со што Дојче банк стана еден од најголемите губитници на индексот на најбогати акции DAX.
Пакетот акции е продаден за околу 256 милиони евра или 278,84 милиони долари и претставува околу 0,8 отсто од акциите на Дојче банк во оптек.
Продажбата уследи по порастот на вредноста на акциите од околу 30 отсто досега оваа година.
Голдман Сакс, кој ја договори продажбата на акциите, рече дека акциите се продадени по 16,01 евро, но одби да даде дополнителни детали.
Дојче банк не сакаше да ја коментира оваа продажба за Ројтерс, но аналитичарите сметаат дека одлуката е рационална.
„Ова е одлука на инвеститорот, кој се води од сопствениот рационален процес на одлучување“, вели Роланд Пфандер, аналитичар од ОДДО-БХФ.
Но, тој додаде дека продажбата може да изврши одреден притисок врз акциите на краток рок.
