На почетокот на 2021 година, германските работодавци благо ги намалија плановите за вработување нова работна сила. Барометарот за вработување, пресметан од институтот IFO (Institute for Economic Research), се намали на 95 поени во јануари од декемвриското ниво од 95,5 поени, се вели во соопштението на институтот, додавајќи дека обновените мерки за заклучување поради коронавирус доведуваат до зголемени отпуштања, особено во секторот за трговија на мало.
Во производствениот сектор, барометарот за вработување се подобри во јануари осми месец по ред, од минус 11 поени во декември на минус 10 поени овој месец. Сепак, повеќето компании планираат да ја намалат работната сила во наредниот период.
Меѓу давателите на услуги, бројките за вработување и отпуштања се избалансирани. Консултантски компании за ИТ секторот и менаџмент имаат намера да продолжат да го зголемуваат бројот на вработени.
Најмногу најавувани отпуштања во јануари беа во секторот за трговија на мало поради продолжување на затворањето, со што показателот на барометар за вработување се спушти на минус 8,9 поени од минус 1,5 поени во декември.
Единствениот позитивен исклучок во бизнисот со малопродажба се супермаркетите, кои сепак планираат да вработат нов персонал.
Некои компании во градежната индустрија, и покрај зимската сезона кога нивната активност обично се намалува, размислуваат и за нови вработувања.
Фото: Freepik
