Во Сити Хол Центар, Скопје, Проектот на УСАИД за микро и мали претпријатија, кофинансиран од Владата на Швајцарија, имплементиран од Центарот за развој на претприемачи и менаџери ЦЕЕД Македонија, денеска беше домаќин на Бизнис за бизнис (Business to Business) вмрежување меѓу компании од Македонија и Косово.
Г. Стефан Томаџан, заменик шеф на мисијата на Амбасадата на Швајцарија во Р. Македонија, изјави: “Целта на овој настан е да креира можности за соработка меѓу компании од Македонија и Косово. Соработката меѓу компаниите од регионот е многу важна, особено за помалите економии, како овие две земји.”
На настанот присуствуваа сопственици на микро и мали компании, учесници во Проектот, членови на ЦЕЕД бизнис и едукативниот клуб од Македонија и членови на ЦЕЕД Косово.
Г-ѓа Татјана Марковска, проект менаџер од Канцеларијата за економски развој, УСАИД, изјави: “Од аспект на продажба и извоз, настаните за вмрежување се една од најважните активности на Проектот за учесниците, затоа што претставуваат можност за запознавање со нови пазари, создавање нови контакти и воспоставување нови партнерства.”
Бизнис за бизнис (Б2Б) средбите се одлична можност за запознавање со условите на странските пазари, за истражување нови можности и остварување релации со потенцијал да прераснат во бизнис партнерства.
Започнат од УСАИД во јули 2011 година, кофинансиран од Владата на Швајцарија, Проектот за микро и мали претпријатија во вредност од 3.079.400 милиони долари е петгодишен проект за поддршка на микро и мали бизниси преку тренинг, вмрежување, менторство, консалтинг, поддршка на извозот и пристап до инвестициски фонд. Активностите на проектот се имплементираат во осум региони и ја покриваат целата територија на Македонија. ЦЕЕД Македонија е една од институциите во наследство на УСАИД и е имплементатор на Проектот.
