Компанијата „Беркшир Хатавеј“, во сопственост на легендарниот инвеститор Ворен Бафет, постигна договор за купување на петрохемиската дивизија на „Оксидентал Петролеум“ (ОксиКем) за околу 9,7 милијарди долари, објавија американските медиуми.
Овој потег ја означува најголемата аквизиција на „Беркшир Хатавеј“ во последните години и сигнализира дека Бафет продолжува да го проширува своето портфолио во секторите за енергија и основни материјали.
Според „Фајненшл тајмс“ и „Ројтерс“, продажбата на „ОксиКем“ ќе му овозможи на „Оксидентал“ да го намали својот долг за околу 6,5 милијарди долари, додека „Беркшир“ дополнително ќе ја зајакне својата позиција во енергетскиот сектор, во кој веќе има значителни удели.
– „ОксиКем“ е стабилен, профитабилен бизнис со силна пазарна позиција во сегментите на индустриски хемикалии, пластика и производи за третман на вода. Оваа трансакција го зајакнува нашето портфолио на долг рок и ги диверзифицира изворите на приход на „Беркшир Хатавеј“, соопшти компанијата.
Се очекува аквизицијата да биде завршена во четвртиот квартал од 2025 година, под услов да бидат добиени потребните регулаторни одобренија.
„ОксиКем“ е еден од најголемите производители на винил хлорид, ПВЦ и натриум хидроксид во Соединетите Американски Држави, кој управува со повеќе од 20 објекти низ целата земја.
Аквизицијата доаѓа во време кога Бафет сè повеќе се фокусира на стабилни и предвидливи индустрии, додека енергетското портфолио на „Беркшир“ вклучува и значителни удели во „Оксидентал Петролеум“, „Шеврон“ и „Беркшир Хатавеј Енерџи“.
Според аналитичарите, со овој потег Бафет и неговиот наследник Грег Абел – кој го води енергетскиот сегмент на компанијата – „покажуваат долгорочна доверба во побарувачката за индустриски суровини“ и ја продолжуваат стратегијата на инвестирање во реални, продуктивни сектори.