Централната банка на Русија (БР) денеска соопшти дека донела одлука за зголемување на референтната каматна стапка за 200 базични поени, од 16 на 18 отсто.
„Инфлацијата забрза и се развива значително над априлската прогноза на Банката на Русија. Растот на домашната побарувачка продолжува да ги надминува можностите за проширување на понудата на стоки и услуги“, се наведува во соопштението.
Како што е наведено, потребно е дополнително заострување на монетарната политика со цел инфлацијата во Русија повторно да почне да опаѓа. Врз основа на сегашните податоци, банката ја зголеми својата проценка за годишната инфлација во Русија и сега верува дека таа ќе се движи меѓу 6,5 и 7 проценти во 2024 година, додека претходно очекуваше инфлација меѓу 4,3 и 4,8 проценти оваа година.
Според ажурираната прогноза, инфлацијата во Русија следната година ќе биде во опсег меѓу четири и 4,5 проценти, а во 2026 година ќе падне на четири проценти, според стапките на банката.
Следниот состанок на Банката на Русија за монетарната политика ќе се одржи на 13 септември.
