Светот е на „почетокот на крајот“ на ерата на фосилните горива според водечките светски енергетски чувари, кои за прв пат прогнозираат дека побарувачката за нафта, природен гас и јаглен ќе достигне врв пред 2030 година.
Новите проекции на Меѓународната агенција за енергија (ИЕА) предвидуваат дека потрошувачката на трите главни фосилни горива ќе почне да опаѓа во тековната деценија поради брзиот раст на обновливите извори на енергија и ширењето на употребата на електрични возила, пренесува Фајненшл Тајмс.
„Сведоци сме на почетокот на крајот на ерата на фосилните горива и мора да се подготвиме за следната ера. Тоа покажува дека климатските политики функционираат“, рече шефот на ИЕА, Фатих Бирол. Тој ја поздрави „историската пресвртница“, но ги повика креаторите на политиката да направат повеќе за да ја забрзаат енергетската транзиција и да ги намалат емисиите, и покрај политичките пречки за декарбонизација.
Владите ширум светот ги зголемија инвестициите во обновливи извори на енергија како одговор на климатските промени и енергетската криза предизвикана од руската инвазија на Украина, но многумина се бореа со трошоците во услови на инфлациски притисоци.
ИЕА финансирана од ОЕЦД минатата година соопшти дека вкупната побарувачка за фосилни горива би можела да достигне врв околу 2030 година. Сепак, сега ги ревидираше своите проекции, бидејќи примената на обновливите технологии се забрза во текот на изминатите 12 месеци.
Според Бирол, во текот на изминатите 10 години, Кина претставува околу една третина од растот на глобалната побарувачка за природен гас и две третини од растот на побарувачката за нафта. Тој оцени дека соларната, нуклеарната и обновливата енергија ќе го заменат потенцијалниот раст на побарувачката на јаглен во Кина.
Бирол, исто така, изјави дека новите големи проекти за експлоатација на фосилни горива „носат не само големи климатски ризици, туку и големи финансиски ризици“. Истовремено, Групацијата Ургевалд, која го следи глобалното финансирање на фосилните горива, објави дека Светската банка минатата година инвестирала не помалку од 3,7 милијарди долари во развој на проекти за експлоатација на нафта и гас, пишува Гардијан.
