Европскиот пазар на нови автомобили во август ги забележа првите добивки по 13 месеци. Сепак, ова закрепнување би можело да биде краткотрајно бидејќи енергетската криза и рекордната инфлација ги обесхрабруваат купувачите.
Бројот на регистрации минатиот месец се зголеми на 748.961 возила или за 3,4 отсто, објави Асоцијацијата на европски производители на автомобили. Германската компанија Mercedes-Benz забележа раст од 16 отсто во однос на минатата година, пишува Bloomberg.
Производителите на автомобили гледаат знаци на подобрување бидејќи проблемите со синџирот на снабдување, како што е недостигот на полупроводници, почнуваат да се решаваат. Сепак, неконтролираната инфлација и забавувањето на глобалната економија фрлаат сенка врз прогнозите за продажба. Резултатите од минатиот месец беа послаби во споредба со истиот период претходната година и сè уште се под нивото пред пандемијата.
„Високата инфлација, зголемувањето на каматните стапки и падот на активноста на потрошувачите, заедно со подолгите циклуси на замена на возила, и покрај тоа што новите автомобили се посигурни, и технолошките промени би можеле да претставуваат предизвик за основната побарувачка во 2023 година и понатаму“, рече Џилијан Дејвис од Bloomberg Intelligence.