Буџетскиот дефицит на САД се намали за 41 милијарда долари на 1.775 милијарди долари во фискалната 2025 година, бидејќи зголемувањето на приходите од царини наметнати од претседателот на САД Доналд Трамп и намалувањето на трошоците за образование помогнаа да се компензираат повисоките трошоци за здравствена заштита, пензии и камати на долгот, соопшти Министерството за финансии на САД.
Ова е резултатот за фискалната година што заврши на 30 септември, која вклучува речиси девет месеци од вториот мандат на Трамп во Белата куќа. За споредба, во фискалната 2024 година, буџетскиот дефицит изнесуваше 1.817 милијарди долари. Буџетскиот дефицит на САД со тоа беше намален за прв пат од 2022 година, кога откажувањето на програмите за помош поради Ковид-19 ги намали трошоците.
Вкупните буџетски приходи за фискалната 2025 година изнесуваа рекордни 5,235 трилиони долари, што е зголемување за 317 милијарди долари, или 6 проценти, во однос на фискалната 2024 година, додека расходите исто така изнесуваа рекордни 7,01 трилиони долари, што е зголемување за 275 милијарди долари, или 4 проценти, во однос на претходната година.
Помалиот буџетски дефицит во 2025 година беше потпомогнат од рекордните нето царински приходи од 195 милијарди долари, или 118 милијарди долари повеќе од претходната година, директен резултат на царините на Трамп. Но, тој силен нов извор на буџетски приходи беше делумно засенет од намалувањето од 79 милијарди долари на бруто корпоративниот данок на доход за фискалната 2025 година, на 486 милијарди долари.