Германската централна банка, Бундесбанкa, предупреди дека царините објавени од американскиот претседател Доналд Трамп би можеле да ја вратат германската економија во рецесија.
Бруто домашниот производ би можел да се намали оваа година, додека очекуваниот раст од 0,7% за следната година би можел целосно да биде „изеден“, изјави претседателот на Бундесбанка, Јоаким Нагел, на маргините на состанокот на Групата 20 (Г20) на земјите во развој и развиените земји, што се одржа во јужноафриканскиот град Дурбан во петокот.
Нагел рече дека компаниите веќе чувствуваат голема неизвесност, но во исто време истакна дека царинскиот договор не смее да се постигне по секоја цена.
„Тоа е мојата порака, моето барање до американската страна – да не си играме со ситуацијата“, рече Нагел, „бидејќи на крајот, нашиот просперитет е во прашање ако се спроведуваат економски политики што би можеле да предизвикаат голема штета на глобално ниво“.
Германските економски перформанси малку се намалија во претходните две години, но бруто домашниот производ малку се зголеми во првиот квартал од 2025 година.
Трамп објави планови за воведување царини од 30% за увоз од Европската Унија почнувајќи од 1 август. Неговиот министер за финансии, Скот Бесант, се придружи на посебен состанок на Групата седум најразвиени земји (Г7) во Дурбан преку видео врска.
Германскиот министер за финансии Ларс Клингбеил изјави дека со Трамп е постигнат широк договор дека мора да се најде решение. Во исто време, тој нагласи дека „нема да има договор по никаква цена“.
Европската Унија е секогаш подготвена да преземе решителни контрамерки со цел да ги заштити работните места и компаниите во Европа, рече тој.