Кинеската компанија CATL, најголемиот производител на батерии во светот, ја разгледува можноста за изградба на фабрика во САД доколку новоизбраниот претседател Доналд Трамп ја отвори вратата за кинески инвестиции во секторот на електрични возила, соопшти основачот и претседател на компанијата CATL Робин Зенг.
Тој рече дека кинеските компании за електрични автомобили и батерии биле исклучени од американскиот пазар со протекционистички трговски мерки поддржани и од демократите и од републиканците, вклучувајќи го и Трамп кој започна поширока трговска војна со Кина за време на неговиот прв мандат во 2017 година. Во моментов, кинеските батерии не се квалификуваат за субвенции за американските потрошувачи, а електричните автомобили од Кина подлежат на тарифи од 100 отсто, всушност забрана, пишува Ројтерс.
Сепак, Зенг сè уште покажува интерес за проширување на CATL во САД, надевајќи се дека во иднина ќе има отвореност за кинески инвестиции. Досега CATL беше присутна на американскиот пазар преку лиценци за производство на батерии. Ford гради фабрика во Мичиген за производство на литиум-фосфатни батерии, а Tesla има сличен договор со CATL во Невада за производство на батерии, кои треба да започнат со работа во 2025 година.
