Цените на природниот гас во Европа денес се зголемија за речиси пет проценти на околу 50,8 евра за мегават-час (MWh), по новите конфликти меѓу Соединетите Американски Држави и Иран.
Според податоците од берзата во Амстердам TTF, цената на гасот во 13:30 часот била 50.830 евра за мегават-час.
Централната команда на САД објави дека американските сили извршиле нова серија напади врз десетици цели во Иран, со цел да го спречат Техеран да го загрози морскиот сообраќај преку Ормутскиот теснец, објавија медиумите.
Иран одговори со напаѓање на земјите во регионот кои имаат американски воени сили на нивна територија, вклучувајќи ги Кувајт, Бахреин и Јордан.
Дополнителна неизвесност на енергетскиот пазар беше предизвикана од различни информации за статусот на Ормутскиот теснец.
Вашингтон тврди дека клучниот транзитен пат за нафта од Персискиот Залив е сè уште отворен, додека Техеран изјави дека преминот е затворен „до понатамошно известување“.