Цените на нафтата пораснаа минатата недела трета последователна недела, но само благо, бидејќи инвеститорите стравуваат дека ескалацијата на тарифната војна може да ѝ наштети на меѓународната трговија и глобалниот економски раст.
Цената на барелот на лондонскиот пазар минатата недела порасна за 1,9 отсто, на 73,63 долари, додека на американскиот пазар цената на барелот порасна за 1,6 отсто, на 69,36 долари.
На почетокот на март цените на нафтата паднаа на најниско ниво оваа година, но оттогаш се зголемија за повеќе од 6 отсто.
Ова во голема мера е последица на санкциите на Вашингтон. Прво, пред десетина дена воведе нови санкции за иранската нафта, а минатата недела американскиот претседател Доналд Трамп најави нови царини од 25 отсто за купувачите на венецуелска нафта и гас.
Со оглед на тоа што санкциите за руската нафта се одамна на сила, јасно е дека најновите ограничувања ќе ја намалат понудата на светскиот пазар.
Сепак, значителното зголемување на цената на нафтата се спречува поради стравувањата од забавување на економскиот раст, а можеби дури и од рецесија, што би ја ослабнало побарувачката.
Имено, минатата недела Трамп најави царини од 25 отсто за целиот увоз на автомобили почнувајќи од почетокот на април, а деновиве ќе го објави и конечниот план за реципрочни царини за сите земји кои наплаќаат царини за увезената американска стока.
Бидејќи многу земји, вклучително и Канада, Кина и Европската унија, најавија контрамерки, инвеститорите стравуваат од ескалација на тарифната војна.