Цените на нафтата се задржаа во средата додека пазарите го проценија потенцијалното влијание на договорот за прекин на огнот меѓу Израел и Хезболах пред состанокот на ОПЕК + во недела.
Фјучерсите на суровата нафта „брент“ се зголемија за пет центи на 72,86 долари за барел во утринското тргување, додека фјучерсите на американската „Вест Тексас интермедијт“ (WTI) поскапеа за три центи на 68,80 долари за барел.
Цените на нафтата во моментов се потценети поради пазарниот дефицит и потенцијалните закани за снабдување од Иран поради можните санкции под новоизбраниот американски претседател Доналд Трамп, според шефот за истражување на стоки во Голдман Сакс и Морган Стенли.
„Сметаме дека цените на нафтата се околу пет долари за барел потценети во однос на објективната вредност врз основа на нивоата на залихи“, изјави за новинарите во средата Даан Струјвен, копретседател на глобалното истражување на стоки во Голдман Сакс.
Се проценува дека нафтениот пазар бил во дефицит од околу половина милион барели дневно во текот на изминатата година, објасни Струјвен, цитиран од Ројтерс, додавајќи дека е веројатно Кина и САД да продолжат да ги пополнуваат своите стратешки резерви за заради енергетската безбедност.
Тој посочи дека овие фактори, заедно со помалото производство од страна на производителите од групата ОПЕК + и можното заострување на санкциите кон Иран – што би можело да ја намали понудата за околу 1 милион барели дневно – може да ги зголеми цените на нафтата на краток рок.
„Зборуваме за рамнотежа за околу една година пред нас, така што мислам дека цената на нафтата веќе до одреден степен ги одразува очекувањата за она што следува“, додаде тој.
Се предвидува дека суровата нафта од типот „брент“ ќе достигне максимум од околу 78 долари за барел до следниот јуни, пред да падне на 71 долар до 2026 година, бидејќи има значителен вишок капацитет за справување со недостигот на снабдување доколку е потребно, рече Струјвен.
Мартијн Ратс, главен стратег за суровини во Морган Стенли, изјави за Ројтерс минатата недела дека цените на нафтата треба да бидат за неколку долари повисоки поради ниските нивоа на залихи.
