Советот на Централната банка на Црна Гора (ЦБЦГ) донесе одлука за одземање на одобрението за обезбедување услуги за плаќање на платежната институција Алта Пеј Груп од Подгорица, откако беше утврдено дека таа повеќе не ги исполнува законски пропишаните услови за вршење на таа дејност, објави вчера ЦБЦГ.
Во соопштението објавено на Фејсбук се наведува дека одлуката е донесена во согласност со црногорскиот Закон за платни трансакции, врз основа на сеопфатна проценка на исполнувањето на регулаторните барања, вклучувајќи ги и критериумите поврзани со подобноста на квалификуваниот акционер и обезбедувањето стабилно, безбедно и законско работење на платежната институција.
ЦБЦГ нагласи дека оваа одлука не претставува ризик за финансиската стабилност на Црна Гора, ниту влијае на редовното функционирање на платниот систем.
Како што е наведено, Алта Пеј Груп не е банка, не прифаќа депозити од граѓани и бизниси и нема никакво влијание врз стабилноста на финансискиот систем на Црна Гора.
Централната банка на Црна Гора, како што се истакнува, навремено ги презеде сите активности во рамките на својата надлежност со цел, во светлината на актуелните настани, да обезбеди уредно извршување на обврските на таа платежна институција и да ги заштити интересите на корисниците.
Инаку вчера, Народната банка на Македонија воведе администрација во „АЛТА банка” АД Битола, а клиентите на оваа банка ги ограничија подигнувањата на максимум 10.000 денари или околу 160 евра неделно.
На 30 октомври, Народната банка на Србија ја одзеде лиценцата за работа на Алта банка А.Д. Белград и го предаде нејзиното управување на Агенцијата за осигурување на депозити.