Четботот ChatGPT, базиран на вештачка интелигенција, ќе добие можности за родителска контрола во наредните месеци, објави американската технолошка компанија што стои зад ботот.
Одлуката следува по тужбата поднесена против компанијата од страна на родителите на 16-годишно момче од Калифорнија, кои го обвинуваат ChatGPT за самоубиството на нивниот син.
„Во наредните месеци, родителите ќе можат да ја поврзат својата сметка со сметката на нивниот тинејџер. Со правила соодветни на возраста, тие ќе можат да контролираат како ChatGPT реагира на нивниот тинејџер“, напиша OpenAI во блог пост, според француската новинска агенција AFP.
ChatGPT, исто така, ќе испраќа известувања до родителите кога ќе открие дека нивното дете е „во сериозна неволја“. „Продолжуваме да го подобруваме начинот на кој нашите модели препознаваат и реагираат на знаци на ментален и емоционален стрес“, додаде компанијата.
