До 25-ти март продолжен рокот за доставување годишни сметки до Централниот регистар

25

Централниот регистар го продолжи рокот за доставување годишна сметка до 25-ти март 2021 година.

“Согласно барањата пристигнати до Централниот регистар, со кои се бара одложување на рокот за доставување на годишна сметка известуваме дека Централниот регистар одлучи да излезе во пресрет на обврзниците за поднесување на годишна сметка и на сметководителите и да го продолжи рокот за електронско поднесување заклучно со 25.03.2021 година до 24 часот“, информираат од Централниот регистар, пренесува МИА.

Ваквата одлука за пролонгирање на рокот, како што наведуваат, се носи согласно ситуацијата и мерките од Владата за заштита и превенција од вирусот covid-19, како и поради тоа што голем број од сметководителите се заболени од вирусот и не се во можност да ги запазат законските рокови.

Потенцираат дека одлуката за пролонгирање на рокот е во согласност со член 477 од Законот за Трговски друштва.

Од Централниот регистар наведуваат дека заклучно со вчерашниот ден, 11 март над 90 отсто од обврзниците веќе ја поднеле годишната сметка, но, посочуваат, сепак Централен регистар како сервисно ориентирана институција, секогаш е подготвена да одговори на барањата на своите корисници, во рамките на законските можности.

Фото: Pixabay