Во периодот по глобалната економска криза од 2008 година, постои тренд на растечка траекторија кај останатите финансиски институции (ОФИ), смета гувернерката на Народна банка на воведното обраќање на првата од серијалот е-работилници за новинари.
“Се забележуваат дури и двоцифрени стапки на раст, од кои не е исклучок и нашата економија. Една од причините за тоа се направените големи регулаторни реформи во финансиската сфера во периодот по кризата од 2008 година. Овој тренд е значаен од повеќе аспекти. Од една страна, значи поголема понуда на финансиски производи и нови можности за инвестирање, но од друга страна бара и поголема внимателност, пред сѐ за заштита на потрошувачите од преземање прекумерни ризици, преку финансиска едукација и воспоставување институционални механизми за нивна заштита“, истакна во воведното обраќање, гувернерката на Народната банка, Анита Ангеловска-Бежоска.
Инаку, како останати финансиски институции се вбројуваат пензиските фондови, осигурителните друштва, инвестициските фондови, друштвата за управување со инвестициските фондови и друштвата за управување со пензиските фондови, финансиските друштва и друштвата даватели на финансиски лизинг.
Народната банка, иако не е регулатор надлежен за овие институции, во согласност со меѓународните стандарди ја изготвува оваа статистика, којашто е особено значајна заради сѐ поголемата улога на ОФИ во финансискиот сектор и нивното сѐ поголемо значење во финансиското посредување. Оттука, секако, за централните банки, освен за водењето на монетарна политика, оваа статистика е особено значајна и заради остварување на целта за одржување на финансиската стабилност.
