Иако само малцинство работници во еврозоната стравуваат дека американските царини би можеле да ги загрозат нивните работни места, тоа сепак би можело да го забави растот во веќе ослабената европска економија, напишаа експерти од Европската централна банка (EЦБ) во петокот во официјален блог пост.
Во јули, американската влада воведе серија царини за увоз на стоки од Европската Унија, со што ефективната царинска стапка се зголеми на околу 13,1 процент, од претходните 2,3 проценти, што е голем проблем за ЕУ, бидејќи САД се сè уште убедливо најголемиот европски извозен пазар.
Иако само 15 проценти од европските работници велат дека се плашат дека царините би можеле да ги доведат во опасност нивните работни места, тоа сепак би можело да има значително влијание врз европската економија, според истражувачите на ЕЦБ, врз основа на податоците од најновото истражување за очекувањата на европските потрошувачи.
„Работниците кои најмногу очекуваат да останат без работа, најверојатно ќе ги изгубат своите работни места многу подоцна. Значи, додека директниот ефект од американските царини врз работните места се чини дека е ограничен досега, ефектот врз некои работници би можел да биде поизразен и би можел дополнително да го намали оптимизмот на бизнисот и потрошувачите.“
Податоците од истражувањето би можеле да бидат значајни, бидејќи ЕЦБ очекува дека најголемиот дел од европскиот економски раст оваа и следната година ќе дојде првенствено од домашната потрошувачка, делумно поради тоа што домаќинствата трошат средства од нивната инаку висока стапка на лични заштеди.
Но, како што заштедите продолжуваат да растат, претставниците на монетарната политика сега ја преиспитуваат таа претпоставка, со оглед на тоа што неизвесностите околу економските случувања веројатно нема да исчезнат наскоро, според белешките од нивниот септемвриски состанок објавени во четврток.
Затоа, резултатите од анкетата укажуваат на негативен ризик за европскиот економски раст поради американските царини, што би можело да има домино ефект во економија која моментално расте со ниска стапка од околу 1 процент.
