Брисел планира да ги принуди кинеските компании да ја префрлат интелектуалната сопственост на европските фирми во замена за субвенции од ЕУ како дел од построгиот трговски режим за чисти технологии, пишува Financial Times. Според високи претставници на ЕУ, новите критериуми со кои се бара кинеските компании да имаат фабрики во Европа и да споделуваат технолошко знаење ќе бидат воведени кога Брисел во декември ќе објави тендер за грант од милијарди евра за развој на батерии за електрични возила, а пилотот може да биде се прошири и на другите шеми за субвенционирање на ЕУ.
Барањата, иако многу помали по обем, го одразуваат кинескиот режим, бидејќи Кина врши притисок врз странските компании да ја споделат нивната интелектуална сопственост во замена за пристап до кинескиот пазар. Критериумите би можеле да бидат предмет на промена пред тендерот, велат официјалните лица. Плановите се дел од построгиот став на Европа кон Кина. Минатиот месец, Европската комисија потврди тарифи до 35 отсто за кинеските електрични возила, покрај постојните 10 отсто. Исто така, воведе построги барања за компаниите кои аплицираат за субвенции за водород, пропишувајќи дека само 25 отсто од материјалите што се користат за производство на водород може да се набавуваат од Кина.
Блиски соработници на новоизбраниот американски претседател Доналд Трамп најавија дека тој ќе изврши притисок врз ЕУ да го следи примерот и да подигне повеќе бариери за кинеските стоки и инвестиции. Ако Трамп продолжи со својата закана за царини од 60 отсто за кинескиот извоз, Пекинг тогаш најверојатно ќе се обиде да ги пренасочи кон други региони како што е ЕУ. Постои зголемена загриженост за слабоста на економијата на ЕУ и способноста на компаниите да ги исполнат амбициозните климатски цели без да се потпираат на евтин увоз. Брисел, исто така, воведе цели за домашното производство во законодавството насочено кон поттикнување чисти технологии усвоено во мај.
Елизабета Корнаго, виш научен соработник во Центарот за европски реформи, рече дека Комисијата се обидува да најде многу идеи за да ја зајакне својата трговска одбрана против пренасочувањето на кинеските трговски текови кон Европа. Таа, исто така, предупреди дека построгиот однос кон кинеските компоненти може да има негативно влијание врз напорите на ЕУ за декарбонизација. Засилената контрола на увозот на кинеска технологија веќе ги натера компаниите како што е кинеската CATL, најголемиот светски производител на батерии, да отворат гигафабрики во Европа CATL инвестираше милијарди евра во погони во Унгарија и Германија, а Envision Energy со седиште во Шангај исто така инвестира стотици милиони евра за погоните во Шпанија и Франција.
На состанокот зад затворени врати претходно оваа година, кинеското Министерство за трговија ги предупреди домашните производители на автомобили да не инвестираат големи средства во Европа и ги советуваше да постават производствени линии на континентот само за последниот чекор на склопување, наведувајќи ја политичката неизвесност во Брисел. Во меѓувреме, европскиот батериски гигант Northvolt, со седиште во Шведска, е на работ на банкрот бидејќи се бори да го зголеми производството. Батериите сочинуваат значителен дел од електричните возила, сочинуваат повеќе од една третина од трошоците, што ги прави синџирите за снабдување со батерии клучни за европската индустрија за производство на автомобили додека се обидува да премине кон модели кои помалку загадуваат, пишва Лидер.хр.
