Еуроконтрол, кој управува со европскиот воздушен простор, рече дека ќе има „голем товар“ на сообраќај во многу важни региони во текот на летото.
Патниците кои имаат намера да патуваат со авион се предупредени за „предизвикувачко“ лето. Тоа предупредување беше издадено на почетокот на летната сезона, со околу 33.000 дневни летови низ Европа во следните осум недели, што е за околу осум отсто повеќе во споредба со истиот период во 2022 година, пишува британски Тајмс.
Според извештаите, густ сообраќај се очекува во Ремс и Марсеј во Франција, Атина и Будимпешта, Лондон, Барселона, Брисел, Будимпешта, Никозија, Варшава и Загреб во деновите на шпицот, особено во петок и за време на летните викенди.
Се додава дека „преоптоварувањето“ може да доведе до одложувања и авионите да бидат принудени да одат на подолги рути за да ги избегнат критичните области. Генералниот директор на Еуроконтрол, Раул Медина, изјави дека војната во Украина, односно воените потреби имаа влијание врз немањето слободен воздушен простор.
– Аеродромите мора да бидат добро екипирани, од витално значење е услугите на воздушниот сообраќај да обезбедат доволно капацитет и авиокомпаниите да се придржуваат до нивните распореди – рече тој, додавајќи дека достапноста на воздушниот простор е намалена за 20 проценти.
Шефот на Меѓународната асоцијација за воздушен транспорт, Вили Волш, минатиот месец рече дека авиокомпаниите имаат сериозна загриженост за контролата на воздушниот сообраќај и дека прекинот во јуни е „многу над она што е нормално за овој период од годината“.
– Имаме хаотична ситуација во која гледаме речиси секојдневни штрајкови на контролата на летање, што го нарушува сообраќајот не само во Франција, туку и во цела Европа, бидејќи ги принудува авиокомпаниите да се пренасочуваат кон други земји – рече тој.
