Претседателката на Европската комисија Урсула фон дер Лајен вели дека најголемиот единствен пазар во светот знае како да се одбрани од напади.
Европската унија има силен план да возврати на американските трговски тарифи и, доколку е потребно, ќе го искористи, предупреди претседателката на Европската комисија Урсула фон дер Лајен.
– Нашата цел е решение со преговори. Но, се разбира, доколку е потребно, ќе ги заштитиме нашите интереси, нашите луѓе и нашите компании – рече фон дер Лајен, обраќајќи им се на пратениците во Европскиот парламент во Стразбур.
За време на сесијата на ЕП посветена на состанокот на Европскиот совет на 20 март во Брисел, таа истакна дека Комисијата внимателно ќе ги оцени американските најави за царини за да го прилагоди својот одговор.
Таа оцени дека ќе биде подобро сите да најдат конструктивно решение, но нагласи дека Европа не ја започнала оваа конфронтација.
– Не мора да сакаме да возвратиме. Но, доколку е потребно, имаме силен план да возвратиме и ќе го искористиме – рече фон дер Лајен.
