Повеќето Европејци би сакале некои членови на парламентите во одделни земји да бидат заменети со вештачка интелигенција.
Истражувачи од Центарот за управување со промени при приватниот шпански универзитет, Универзитет ИЕ (IE University), анкетирале 2.769 лица од 11 земји низ целиот свет, прашувајќи ги како би се чувствувале за намалувањето на бројот на членови во националните парламенти на нивните земји, давајќи им ги овие места на вештачката интелигенција кои ќе имаат пристап до нивните податоци.
Резултатите, објавени денеска, покажуваат дека и покрај јасните и очевидни ограничувања на ВИ, 51% од Европејците одговориле дека се за таков потег.
Оскар Џонсон, академски директор во Центарот за управување со промени на Универзитетот ИЕ и еден од водечките истражувачи, за телевизијата CNBC изјави дека речиси “една деценија се забележува намалување на довербата во демократијата како форма на владеење”.
“Причините се најверојатно поврзани со зголемената политичка поларизација, филтер-балоните и расцепканоста на информациите“, истакна Џонсон.
Анкетата покажа дека идејата е особено популарна во Шпанија – 66% од испитаниците ја поддржуваат. Во Италија, 59% од испитаниците биле “за” таа идеја, а во Естонија – 56%.
Во Велика Британија, дури 69% од анкетираните се изјасниле против идејата, додека 56 % биле против во Холандија и 54 % во Германија. Надвор од Европа, околу 75 %од испитаниците во Кина ја поддржаа идејата за замена на парламентарците со вештачка интелигенција, додека 60% од американските испитаници не се согласуваат со тоа.
Мислењата, исто така, драстично се разликуваат зависно од возраста – над 60% од Европејците на возраст од 25-34 години и 56 % од оние на возраст од 34 до 44 години ја поддржаа идејата, додека мнозинството од испитаниците постари од 55 години не сметаат дека тоа е добра идеја.
Фото: Freepik