На европските берзи во понеделник наутро, цените на акциите малку се намалија од рекордните нивоа, бидејќи инвеститорите се загрижени за интензивирањето на конфликтот меѓу Белата куќа и претседателот на Федералните резерви, Џером Пауел.
Индексот STOXX 600 на водечките европски акции падна за 0,2 проценти во 9:30 часот наутро, откако достигна нови рекордни нивоа минатата недела.
Утрово, лондонскиот FTSE индекс изгуби 0,19 проценти, на 10.105 поени, додека франкфуртскиот DAX се лизна за 0,01 процент, на 25.260 поени, а парискиот CAC за 0,37 проценти, на 8.330 поени.
Инвеститорите се претпазливи од заострување на конфликтот меѓу Белата куќа и ФЕД, откако Министерството за правда на САД отвори кривична истрага против претседателот на централната банка Џером Пауел во врска со реновирањето на седиштето на ФЕД во Вашингтон вредно 2,5 милијарди долари.
Пауел потврди во необична видео изјава во неделата навечер дека федералните обвинители отвориле истрага за неговиот извештај до Конгресот за реновирањето на зградата на ФЕД.
Пауел рече дека оваа истрага е уште еден обид на американскиот претседател Доналд Трамп да влијае врз монетарната политика на централната банка. Тој исто така рече дека нема да попушти под притисок и дека неговиот мандат на чело на ФЕД истекува во мај.