Европските берзански индекси денеска бележат пад, втор ден по ред, бидејќи новите царини на американскиот претседател Доналд Трамп за повеќе од 180 земји и територии во светот ги поттикнаа стравувањата од глобална рецесија.
На 2 април, администрацијата на Трамп воведе реципрочни царини за практично сите земји во светот, како и царини од 25 отсто за увоз на сите автомобили од странско производство.
Европската унија е погодена од американските увозни царини од 20 отсто, Велика Британија 10 отсто, Норвешка 15 отсто, а Швајцарија со царини од 31 отсто.
Во Европа, најтешко се погодени компаниите кои во голема мера се потпираат на глобалната трговија и синџирите на снабдување, како и на автомобилскиот сектор.
Индексот DAX на Франкфуртската берза денеска во 9:30 часот падна на 21.533,84 поени, британскиот FTSE 100 на 8.416,08 поени, францускиот CAC 40 на 7.545,16 поени, додека московскиот MOEX се искачи на 2.898,3 поени.
Влијанието на пазарот беше уште посериозно во САД, каде што многу економисти предупредија дека царините може да доведат до рецесија.
Четврток беше најлошиот ден од 2020 година за секој од трите главни американски индекси.
Вредноста на американскиот берзански индекс Dow Jones падна на 40.545,93 поени, S&P 500 на 5.396,52 поени, а вредноста на Nasdaq индексот на 16.550,61 поени.
Европските фјучерси на гас за мај се продаваа на отворањето на берзата ТТФ по цена од 39,005 евра за мегават-час.
Според досегашните податоци на берзата, цената на суровата нафта паднала на 65.496 долари, а на нафтата од типот брент на 68.733 долари.
Цената на златото падна на 3.099,59 долари за унца, а на пченицата на 5,3513 долари за бушел (бушел е еднаков на 27,216 кг).
Вредноста на еврото во однос на доларот на берзата Forex изнесува 1,106641, што претставува највисоко ниво во последните шест месеци за европската валута.
Фото: Pixabay
