Европските берзи ја започнаа новата година со раст

14

На европските берзи утрово, првиот работен ден од новата година, поскапеа акциите, најмногу во технолошкиот и енергетскиот сектор.

Индексот STOXX 600 на водечките европски акции порасна за 0,5 отсто во 9:30 часот, откако загуби речиси 13 отсто минатата година, што е негова најголема загуба од 2018 година.

Утринава франкфуртски DAX зајакна за 0,61 отсто, на 14.008 поени, а париски CAC за 0,88 отсто, на 6.530 поени.

Растот на индексот најмногу се должи на растот на цените на акциите во енергетскиот сектор, во просек за 0,8 отсто и технолошкиот сектор.

Така, европските берзи ја започнаа новата година со раст, откако минатата година нагло паднаа поради агресивното зголемување на каматните стапки од страна на централните банки со цел да се потисне инфлацијата, што ќе го забави растот на економиите, а во некои случаи веројатно ќе предизвика рецесија.

Во понеделник поради празникот ќе бидат затворени берзите во Лондон и Волстрит, а нема да бидат ни поголемиот дел од азиските берзи.