Земјите од Европската унија долго време стравуваат дека американскиот закон за намалување на инфлацијата (IRA) ќе им наштети на европските компании со огромни субвенции.
Сепак, советот на економски „мудреци“ на германската влада ја предупредува ЕУ да избегне трка со САД во субвенциите и да ги насочи своите средства за економијата кон зелената технологија.
ЕУ ќе мора да ја зајакне конкурентноста на европските компании со дополнителни субвенции и на тој начин да одговори на ИРА, која пумпа милијарди долари во американските компании. Сепак, конкуренцијата за субвенции ја поткопува благосостојбата на двете страни на Атлантикот и затоа треба да се избегнува, според анализата презентирана од експерти во петокот.
Унијата веќе поддржува технологии со ниски емисии, како што тоа го прават САД со својот закон. Сепак, ЕУ мора да ги промени своите фондови. Покрај даночните поволности, се наведува во анализата, ИРА им дава на компаниите повеќе можности за планирање отколку што е случајот со фондовите во Европа, а има и помалку бирократски пречки.
Во ЕУ треба да се утврди како компаниите полесно да ги користат средствата и како да ја намалат бирократијата, изјави членката на советот Улрике Малмендир, пренесува dpa.
Стравовите што се појавија во Европа поради американскиот закон се само делумно оправдани, се вели во анализата. „Субвенциите на ИРА ќе имаат ограничено макроекономско влијание врз ЕУ“. Сепак, субвенциите може да поттикнат одредени индустрии релевантни за климатските цели да инвестираат во САД наместо во ЕУ.
Економистите посочија и дека разликата во цените на енергијата може да има значително поголемо влијание од американскиот закон и дека од тоа треба да се плашат во Европа.
Во последните три месеци, цената на струјата во Германија за киловат-час беше во просек девет евроценти повисока отколку во САД, рече Ахим Тругер. Членот на Советот Мартин Вердинг посочи дека мора брзо да се прошири снабдувањето со електрична енергија на пазарот и енергетската инфраструктура, што ќе ги намали цените.