Вицепремиерот и министер за финансии Зоран Ставрески и гувернерот на Народната банка на Република Македонија Димитар Богов пред вчерашната редовна средба меѓу претставниците на финансиските супервизорски органи, констатираа дека финансикиот сектор во Македонија е стабилен и покрај сите нестабилности и несигурности што владеат во светската економија и светските финансиски пазари.
“Финансискиот сектор во целина е стабилен. Нема системски ризици. Банките и останатите сегменти на финансискиот пазар успеваат да се справат со актуелните предизвици што ги носат европската и светската криза. Конкретно во сегментот на финансиски друштва досега се формирани три од кои едно е за издавање и администрирање картички и две се претежно во делот кредитна активност, факторинг и гаранции”, изјави вицепремиерот Ставрески.
Министерот додаде дека од последната средба промена има и на пазарот на капитал со задолжителната котација. Toj посочи дека по последната законска измена овозможена е котација на 90 друштва кои се пријавени да котираат на Берзата и оти очекува да се случи тоа во јуни откако ќе биде одобрено од страна на Комисијата за хартии од вредност.
Гувернерот Богов потенцира дека новина е тоа што по измените на законот за банки од пред неколку месеци веќе има три барања од три штедилници за трансформација во финансиски друштва. Барањата во НБРМ веќе се процесуирани и постапката продолжува во Министерството за финансии каде ќе бидат разгледани во наредниот период.
Според вицепремиерот и гувернерот, и покрај стабилноста во финансискиот сектор и натаму е потребна координација меѓу Народната банка и Министерството за финансии со следење на актуелните состојби, нови идеи за промена на регулативата и слично.
“Согласно добрите практики и во Република Македонија се одвива кординација меѓу Народната Банка и Министерството за финансии во насока на следење на состојбите во финансискиот сектор и посебно регулаторните тела кои се задолжени за регулирање на финансиските институции. Во таа насока и со гувернерот ќе ја разгледаме состојбата во сите сегменти на финансикиот пазар, вклучително и пазарот на капитал, осигурителните друштва, супервизијата, следењето на финансиските и лизинг друштвата и банкарскиот сектор”, рече министерот Ставрески.
