Извршниот директор на „Фолксваген“, Оливер Блумe, планира големо реструктуирање на компанијата што би можело да резултира со намалување на работните места до 100.000 низ целиот свет во следните неколку години. Во исто време, компанијата има намера да ги намали инвестициите за околу 15 проценти во следните пет години, на нешто повеќе од 130 милијарди евра.
Според германското списание „Менаџер магазин“, Блумe и финансискиот директор Арно Антиц сакаат темелна реорганизација на групацијата. Планот вклучува одвојување на основниот бренд „Фолксваген“ и секторот за автоделови од сегашната групација и нивно претворање во посебни компании, објавува „Ројтерс“.
Среднорочните планови вклучуваат и затворање на неколку производствени погони во Германија. Тие вклучуваат фабрики во Хановер, Цвикау и Емден, како и фабриката на Ауди во Некарсулм, а производството ќе престане по завршувањето на животниот циклус на моделите што моментално се произведуваат таму.
Блумe е под притисок да ја оживее среќата на вториот најголем производител на автомобили во светот, бидејќи се бори со царини, кинеска конкуренција и скап премин кон електрични возила што влијаеја на заработката.
Доколку Фолксваген го запре производството во своите фабрики во Хановер, Цвикау и Емден, како и во фабриката на Ауди во Некарсулм, тоа би била најголемата реорганизација во 89-годишната историја на компанијата, бидејќи сегашните модели на возила постепено се исфрлаат од производство, се додава во извештајот. Предлозите би оделе подалеку од постојната програма за намалување на 50.000 работни места и доаѓаат и покрај договорот од 2024 година со синдикатите што ја исклучува можноста за затворање на германските фабрики оваа деценија.