Автомобилската компанија Фолксваген соопшти дека ќе ја намали својата работна сила во наредните години бидејќи се обидува да ја зголеми профитабилноста и да ја рестартира првично не толку успешната транзиција кон електрични автомобили.
„Во текот на следните години, ќе мораме да ја намалиме нашата работна сила на општествено одговорен начин“, рече Гунар Килијан, раководител за човечки ресурси на групата, според АФП.
Фокусот ќе биде на „делумно предвремено пензионирање во најголема можна мера“, додаде тој, во изјавата објавена по состанокот со вработените во Волфсбург, седиштето на компанијата.
Тој не прецизираше кои брендови, од десет, ќе бидат погодени од новите мерки, но рече дека целта е да се намалат трошоците на вработените надвор од производството за околу 20 проценти.
Фолксваген има приближно 675.800 вработени ширум светот.
Групацијата објави програма за заштеда од 10,8 милијарди долари во јуни за да помогне во зајакнувањето на профитабилноста – нејзините профитни маржи моментално заостануваат зад долгорочната цел од девет до 11 проценти.
Германскиот автомобилски гигант инвестира десетици милијарди евра во развојот на производството на е-возила, но секторот е погоден од слабата глобална економија и малата побарувачка.
