Форд се подготвува да отпушти 8.000 работници

13

Американскиот автомобилски гигант Форд Мотор се подготвува да укине до 8.000 работни места во наредните недели за да го финансира развојот на електрични возила во својата гама.

Како што пишува Блумберг, повикувајќи се на неименувани извори запознаени со планот, кратењата ќе се случат главно во новосоздадената единица Форд Блу, која произведува бензински возила. Сите специфики на стратегијата, наводно, се уште не се дефинирани, па деталите се предмет на промена.

Веста доаѓа веднаш откако американската сојузна држава Мичиген му даде на производителот на автомобили стимулативен пакет од 100 милиони долари во јуни, како дел од планот за отворање работни места. Во извештајот на Блумберг не се споменува колку работни места може да бидат укинати во Мичиген како резултат на новиот развој.

Портпаролот на Форд, Марк Труби, за „Детроит Фри прес“ изјави дека не може да ја потврди веста.

Извршниот директор на Форд, Џим Фарли, рече дека планира да ги намали трошоците за три милијарди долари до 2026 година и сака да го претвори Форд Блу во „мотор за профит и готовина за целата компанија“. Во март, Фарли го реструктуираше производителот на автомобили за да создаде два бизниси – единицата Model e за развој на електрични возила и Ford Blue да се фокусира на возилата со мотори со внатрешно согорување, како што се популарниот пикап F-150, Mustang и Bronco SUV.

Се очекува отпуштањата да погодат различни оперативни функции меѓу канцелариите на Форд и може да се појават во фази, но најверојатно ќе започнат ова лето. Најголем дел од кратењата се очекува да бидат во САД, каде што Форд вработува околу 31.000 работници со полно работно време.