Цените на дизелот во Соединетите Американски Држави паднаа на најниско ниво во последните два месеци, додека суровата нафта од типот Брент падна за 18,5 проценти во текот на изминатите две недели. Олеснувањето на геополитичките тензии, падот на цените на суровата нафта и пониската сезонска побарувачка почнаа да го намалуваат притисокот врз пазарот на горива, по неколку месеци зголемување на трошоците за транспорт и производство.
Просечната малопродажна цена на дизелот во САД во сабота, 14 ноември, изнесуваше 5.998 долари за галон, според податоците од платформата GasBuddy, објавени од Ројтерс. Со тоа, цената падна под границата од шест долари за прв пат по два месеци.
Дизелот забележа силен раст во текот на септември, а на 22 септември достигна рекордни 6.519 долари за галон. Во Калифорнија, цените во еден момент дури и надминаа десет долари, поради ограничените капацитети на рафинериите и построгите стандарди за квалитет на горивото.
Порастот на цените во претходните месеци беше последица на прекините во глобалното снабдување со нафта, предизвикани од американско-израелската војна против Иран, како и украинските напади врз руските рафинерии.
Високите цени на дизелот особено влијаеја врз транспортниот сектор, земјоделците и бизнисите, бидејќи трошоците за ова гориво директно се одразуваат на цените на транспортот на стоки, логистиката и производството. Ваквите случувања придонесоа и за зајакнување на инфлациските притисоци во американската економија.
Падот на цените на нафтата носи олеснување
Според Ројтерс, цените на фјучерсите на нафтата од типот Брент се намалија за 18,5 проценти во текот на изминатите две недели, што, заедно со сезонските фактори, придонесе за пониски цени на горивата на американскиот пазар.
Патрик Де Хан, директор за анализа на пазарот на нафта во GasBuddy, објаснува дека побарувачката традиционално слабее во текот на есента поради помалку патувања, додека крајот на сезоната на урагани го намалува ризикот од прекини во работата на рафинериите во Мексиканскиот Залив.
Воедно, завршувањето на најголемиот дел од сезонското одржување на рафинериите овозможува закрепнување на производството, што дополнително придонесува за стабилизирање на понудата.
Ваквиот развој на настаните влијаеше и на бензинот, чија просечна цена во САД падна под четири долари за галон овој месец, за прв пат од 10 август.
Американската администрација претходно се обиде да ги ограничи зголемените трошоци преку привремени даночни олеснувања за одредени видови дизел, олеснување на санкциите за руското гориво и програма за помош од осум милијарди долари за земјоделците. Сепак, ефектите од тие мерки беа ограничени, додека прекините во снабдувањето останаа изразени.
Падот на цените на нафтата на меѓународниот пазар може да ги ублажи транспортните и производствените трошоци и надвор од САД, доколку трендот продолжи. Сепак, неговото влијание врз малопродажните цени на горивата варира од земја до земја, во зависност од даночното оптоварување, набавните цени и методите на пресметка.
