Франција останува на првото место во Европа според обемот на странски инвестиции. Тоа го зајакнува угледот на оваа земја.
Индустриската област помеѓу општините Дуврин и Били-Берклау во провинцијата От-де-Франс на северот на Франција е зафатена со работа. Се слушаат чекани, заварувачите зујат, виљушкарите пренесуваат тешки метални делови од едниот до другиот крај. Околу илјада работници ја завршуваат работата на првата од трите огромни фабрички хали каде наскоро ќе се произведуваат батерии за електрични автомобили. Тоа е првата гигафабрика во Франција.
Проектот вреден три милијарди евра, наречен Automotive Celle Company ACC, заеднички го спроведуваат европскиот производител на автомобили Stellantis (создаден со спојување на Fiat, Chrysler, Peugeot, Citroen и други), германскиот автомобилски концерн Mercedes и француската нафтена компанија TotalEnergies . Таму треба да се отворат до 2.000 работни места. И тоа е само еден од низата економски проекти во Франција во кои учествуваат странски инвеститори.
Минатата година странските компании најавија 1.300 инвестиции во Франција – меѓу другите во фармацевтската индустрија, телекомуникациите и ИТ секторите. Франција на тој начин ја зајакнува својата водечка позиција во однос на странските инвестиции во Европа, што ја презеде во 2019 година, претекнувајќи ја Велика Британија, пренесува СееБиз.
