Руски Газпром ја зголемува испораката на гас за Кина и очекува наскоро да го достигне максималното планирано ниво преку сибирскиот гасовод, изјави денеска директорот на одборот на директори на компанијата Виктор Зубков.
Тој ја истакна важноста на Кина како најголем извозен пазар на неговата земја, која се соочува со санкции од Запад поради инвазијата на Украина.
„Газпром“ преговара со Кина за можен дополнителен проект за снабдување преку Монголија, рече Зубков на економскиот форум во Боао.
Компанијата, рече тој, е отворена за извоз на други азиски пазари.
Властите во Пекинг ја гледаат Москва како дипломатски партнер во спротивставувањето на доминацијата на САД во глобалните работи и затоа одбиваат да ја осудат инвазијата на Украина.
Пекинг повика на прекин на огнот и преговори, но не и Русија да се повлече.
Кинескиот увоз од Русија, главно нафта и гас, е зголемен за 31,3 отсто за една година.
Тоа му помага на рускиот претседател Владимир Путин да ги надомести изгубените приходи откако САД, Европа и Јапонија го блокираа или ограничија увозот, пишува АП.
„Русија го зголемува снабдувањето со гас за Кина. Снабдувањето со гас преку гасоводот „Силата на Сибир“ наскоро ќе достигне договорен годишен волумен од 38 милијарди кубни метри, односно 1,3 трилиони кубни стапки“, рече Зубков.
Фото: facebook
