Рускиот производител на гас Газпром во вторникот објави дека почнал да ги полни складиштата со гас наменети за продажба на европскиот пазар, што би можело да ги смири стравувањата од недостиг на тој енергент во пресрет на зимата.
Компанијата објави дека одобрила план за полнење на пет подземни складишта со гас овој месец, се вели во соопштението за јавноста објавено во вторник, со напомена дека работата за полнење е веќе започната.
Цените на гас драстично пораснаа во последно време поради стравувањата од недостиг, а рускиот претседател Владимир Путин му нареди на Газпром во октомври да ги зголеми испораките за Австрија и Германија. Шефот на компанијата Алексеј Милер тогаш изјави дека тоа ќе биде можно од 8 ноември, потсетува ДПА.
Газпром беше под жестоки критики во Европа и многу официјални лица велат дека не се подготвил соодветно за европската побарувачка.
Москва ги негира обвинувањата и возврати дека Стариот континент не ги обновиле соодветно залихите по минатогодишната остра зима.
Некои тврдат дека Русија ги намалила испораките на гас за Европа за да го зголеми притисокот врз Германија да издаде сертификат за гасоводот Северен тек 2, што налути некои германски сојузници. САД, Украина и Полска велат дека Москва така го користи гасот како оружје во геополитичката борба за влијание.
