Германската компанија Кеслер ќе произведува електромотори во Технолошката индустриска развојна зона Скопје 1. Согласно договорот, компанијата добива на користење градежно земјиште со површина од 1,3 хектари, а предвидена е изградба на објекти во две фази во коишт ќе се врши производство на електромотори, стои во соопштението.
Во рамки на инвестицијата предвидено е и воспоставување на центар за заеднички и инженерски услуги и развој на нови производи на компанијата Кеслер во Македонија.
Компанијата Кеслер најави дека планира да започне со работа кон крајот на 2018-та година, а производството ќе биде наменето за германскиот пазар. Се планираат најмалку 80 работни места во наредните три години, машински и електро инженери, како и друг висококвалификуван кадар. Од Кеслер информираат дека веќе имаат стапено во контакт со високо образовни институции во нашата земја и планираат соработка со техничките средни училишта. Компанијата планира соработка и со домашни добавувачи за набавка на суровините потребни за нејзиното производство.
Како производител а алатки и системи за машинска обработка и брусење, електромотори, делови за CNC машини, индустриска електроника итн, компанијата Кеслер има над 90-годишна традиција. Ова е нејзина прва инвестиција во производствени погони надвор од матичната земја и ќе биде прва фабрика од ваков тип во Македонија.