Поранешниот крал на крипто, Сем Бaнкмен Фрид, основачот на неуспешната берза FTX, беше прогласен за виновен за измама и перење пари на крајот од едномесечното судење во Њујорк. Тој ќе биде осуден на 28 март, а може да добие и до 110 години затвор.
Иако тешко дека судијата ќе донесе таква одлука, на 31-годишникот сигурно му се заканува повеќедецениска затворска казна.
Сем Бaнкмен Фрид изврши една од најголемите финансиски измами во американската историја. „Овој случај отсекогаш се вртеше околу лаги, мамења и кражби, а ние немаме трпение за тоа“, рече американскиот обвинител Демијан Вилијамс во изјавата по пресудата.
Фрид се изјасни за невин на судењето, тврдејќи дека иако правел грешки, постапил со добра намера.
Случајот со поранешниот „крипто крал“ неодоливо потсетува на случајот со најмладата американска милијардерка Елизабет Холмс, која го измами целиот свет со својата компанија Теранос.
Млади станаа милијардери
Елизабет Холмс на 19 години ја основа компанијата Теранос, а веќе на 31 година достигна сума од 9 милијарди долари, што ја направи најмладата милијардерка во САД. Нејзината компанија користела технологија за која Холмс тврдела дека може да открие болести со неколку капки крв.
Од друга страна, една од најголемите крипто берзи FTX е основана во 2019 година и нејзината вредност во еден момент се проценува на 40 милијарди долари.
Падот на Холмс датира од 2015 година, кога „свиркач“ излезе во јавноста со информации дека нејзината компанија мами на тестови, а минатата година беше одбележана со колапс на берзата FTX.
Години претходно, лабораторискиот техничар Ерика Ченг испрати писмо до регулаторната агенција, тврдејќи дека Теранос има „дупки“ во своето работење.
Револуционерната идеја на младата визионерка, како што ја нарекуваа Елизабет Холмс, се сруши како куќа од карти, откако истрагата покажа дека компанијата не користи сопствени машини за тестирање на крвта и дека уредот дава неверодостојни резултати.
И двајцата се изјаснија за невини
И Фрид и Холмс се изјаснија за невини за време на судењето. Елизабет изјави во 2021 година дека нејзината компанија „мислела дека тоа е навистина одлична идеја“ и се изјасни дека не е виновна.
Фрид во своето сведочење минатата недела призна дека „многу луѓе биле повредени“, но тврди дека постапил со добра волја и не е виновен.
Судењата траеја долго
Судењето на Холмс започна во ноември 2021 година, но повеќе од три години откако Теранос беше распуштен и шест години откако Волстрит журнал откри проблеми со тестовите.
Кон крајот на декември следната година била осудена на 11 години затвор, а во затвор отишла дури во мај годинава. Два месеци подоцна, казната и беше намалена на девет години, шест месеци и 29 дена.
Иако сè уште е рано да се каже дека и на пропаднатиот крал на криптата му претстои долго судење, се верува дека неговите адвокати ќе поднесат жалба на денешната судска одлука.
