Годишната стапка на инфлација во еврозоната беше 1,7 отсто во септември 2024 година, што е пад од 2,2 отсто во август, покажуваат новите податоци на Евростат, Европската статистичка служба.
Првата проценка на инфлацијата за септември, објавена на почетокот на октомври, покажа годишна стапка на инфлација од 1,8 отсто во еврозоната, а беше направена корекција од 0,1 процентен поен Една година претходно, стапката на инфлација во еврозоната беше 4,3 отсто.
Годишната инфлација во Европската унија беше 2,1 отсто во септември 2024 година, што е намалување од 2,4 отсто во август. Една година претходно, таа стапка во ЕУ беше 4,9 отсто.
Најниски годишни стапки се забележани во Ирска, каде што е забележана инфлација од нула проценти, потоа Литванија со инфлација од 0,4 проценти и Словенија и Италија, каде што инфлацијата во двете земји изнесува 0,7 проценти.
Највисоки годишни стапки на инфлација се забележани во Романија, 4,8 отсто, Белгија 4,3 отсто и Полска 4,2 отсто. Според податоците на Евростат, годишната инфлација во Хрватска за септември изнесува 3,1 отсто и е шеста меѓу земјите од ЕУ со највисока годишна стапка на инфлација.
Споредено со август 2024 година, годишната инфлација падна во дваесет земји-членки, според Евростат, во две остана стабилна, а во пет се зголеми.
Во септември 2024 година, најголем придонес во годишната стапка на инфлација во еврозоната имаа услугите со раст од 1,76 процентни поени, потоа храната, алкохолот и тутунот со раст од 0,47 процентни поени, неенергетските индустриски производи со раст од 0,12 процентни поени и енергија, која беше единствена со пад од 0,60 процентни поени.
Следната проценка на инфлацијата во еврозоната со податоци за октомври 2024 година ќе биде објавена на 31 октомври 2024 година.
