Предложената протекционистичка политика на новоизбраниот претседател Доналд Трамп, вклучително и високите царини, ќе ѝ наштетат на економската позиција на Европа – оставајќи ја Германија погодена од кризата особено ранлива, предвидува американската инвестициска банка Голдман Сакс.
По реизборот на Трамп, банката ги намали прогнозите за растот за Европа, предвидувајќи нови трговски тензии со САД, притисок врз европските земји да ги зголемат трошоците за одбрана и намалување на деловната доверба поради поголемиот геополитички ризик. Трамп постојано повторуваше дека Америка плаќа премногу за да ги брани своите европски сојузници, ја доведе во прашање улогата на НАТО и предложи брзо решение за руската војна во Украина, барајќи помали американски трошоци, потсетува Си-Ен-Ен.
Голдман Сакс очекува бруто домашниот производ во 20-те земји кои го користат еврото следната година да порасне за 0,8%, што е повеќе од 1,1% што претходно ги прогнозираше.
„Голем дел од забавувањето на растот доаѓа од поголемата несигурност во трговската политика… вистинската големина на зголемувањето на царините би можела помалку да биде важна од неизвесноста создадена од заканата (на Трамп) да воведе царини за Европа“, напишаа аналитичарите на банката.
Отворената економија на Европа се смета за особено ранлива на протекционистичката агенда на Трамп, а републиканската кампања вети дека ќе воведе високи царини за сите увезени стоки.
Борбениот пристап на Трамп кон трговските односи, исто така, ги поткопува принципите на отворена трговија и конкуренција кои со децении го поттикнаа глобалниот економски раст и беа благодет за еден од најголемите светски трговски блокови, Европската унија.
Централното очекување на Голдман Сакс е „поограничен сет на царини за европските економии“, првенствено насочен кон нивниот извоз на автомобили. Тоа е уште поголема болка за уморната германска економија и најголемиот производител во земјата, Фолксваген, преокупиран со сопствените проблеми.
Голдман Сакс сега очекува германската економија да порасне само 0,5% следната година поради трговските тензии, нешто повеќе од половина од растот од 0,9% што претходно го прогнозираше. Исто така, го намали растот на ОК во 2025 година на 1,4% од 1,6%.
