Глобалната банкарска групација Голдман Сакс ја зголеми прогнозата за раст на европските акции поради растечките изгледи за мир во Украина, пренесува Танјуг.
„За европските акции, гледаме низа потенцијални придобивки од пониски премии за ризик, пониски цени на енергијата, подобрена доверба на потрошувачите, посилен економски раст“, велат стратезите на Голдман предводени од Шерон Бел во белешката до клиентите. Голдман укажа на шпекулациите во медиумите, како и приватните обложувалници, сугерирајќи дека веројатноста за прекин на огнот во Украина оваа година е зголемена на 70 проценти. „Нашите економисти проценуваат потенцијално зголемување на БДП на еврозоната од 0,2 отсто во ограничено сценарио за прекин на огнот“, додаваат стратезите на банката. Голдман Сакс претстави второ, уште поповолно сценарио за прекин на огнот во Украина, според кое економијата на еврозоната би пораснала за 0,5 отсто, пренесува CNBC.
Многу европски индекси вчера достигнаа рекордни високи по веста за најавената средба меѓу американскиот и рускиот претседател Доналд Трамп и Владимир Путин, што може да биде увертира за завршување на војната во Украина, објавија медиумите.