Халбанк прва во регионот се вклучи во глобалната коалиција Priceless Planet на Mastercard

42

Халкбанк АД Скопје, како компанија чија стратегија за општествено одговорно делување се темели на подигнување на еколошката свест, од 20 октомври склучува партнерство со големата глобална иницијатива на Mastercard, наречена Priceless Planet, чија цел е преку својата широка коалиција да обедини повеќе бизниси и потрошувачи од целиот свет за поддршка во засадување 100 милиони дрвја, но и да инспирира колективни акции за решавање на климатските промени.

Халкбанк е првата и единствена банка од регионот којашто се вклучува во оваа голема коалиција, а придонесот кон иницијативата ќе го реализира како дополнување на својата веќе етаблирана еко платформата ХалкЕко. Долгорочната заложба на банката за зачувување на животната средина веќе беше препознаена од Mastercard, но сега поддршката се проширува и надополнува во уште поголеми размери и во периодот што следи, Халкбанк ќе ја даде својата поддршка со активирање низ повеќе различни кампањи, а со цел зголемување на колективната свест, но и на индивидуалниот придонес кон заштита на планетата.

“Зачувувањето на шумите, но и на севкупната добросостојба на нашата планета, е нешто што нѐ засега сите и обврска пред која што не смееме да си дозволиме да застанеме, особено кога се работи за нашата локална заедница. Ние, како еко-ориентирана компанија, преку кампањата ХалкЕко и преку голем број спроведени акции и иницијативи, правиме навистина големи напори да дадеме видлив придонес кон подобра, почиста и поздрава средина за сите, но и кон поттикнување поголема одговорност кај секој еден чинител во општеството. Иницијативата Priceless Planet ја поздравуваме и со големо задоволство можам да кажам дека сме навистина горди што Халкбанк АД Скопје е препознаена како рамноправен партнер во оваа глобална коалиција и возбудени сме што имаме прилика да го дадеме својот придонес не само локално, туку и надвор од нашите граници“, изјави Билал Суџубаши, Главен извршен директор на Халкбанк АД Скопје.

Коалицијата Priceless Planet е лансирана во јануари 2020 година како одговор на големиот број пожари и елементарни непогоди коишто ја зафатија нашата планета. Таа ги обединува напорите на потрошувачите, финансиските институции, трговците и градовите ширум светот за борба против климатските промени преку обновување на 100 милиони дрвја во текот на пет години, а во коалицијата членуваат и експертите за шумарство CI, Conversation International и Институтот за светски ресурси (WRI, World Resource Institute).

Од Mastercard велат дека преку коалицијата ја зајакнуваат нивната глобална мрежа на партнери и потрошувачи кои ја споделуваат посветеноста на компанијата да биде силата која чини добро во светот и заедно се обединуваат во акција која ќе создаде забрзано влијание за животната средина.

“Токму денес, нашата коалиција се проширува со нови глобални партнери од повеќе региони од целиот свет, како и еминентни експерти за животна средина кои ќе бидат дел од новиот Советодавен комитет. Халкбанк АД Скопје е засега единствената банка од нашиот регион што оваа година се приклучува кон коалицијата и среќни сме што оваа глобална иницијатива добива и локална препознаеност, односно преку локални партнери кои ќе имплементираат локални кампањи за животната средина, заедно ќе работиме на подигнување и на локалната свест. Ние како Mastercard остануваме посветени кон одржливо делување и во самата структура на нашиот бизнис, вклучувајќи ја тука и нашата стратегија за дигитални производи, но и кон вложување постојани напори за подигање на свеста и мобилизирање што повеќе луѓе и бизниси кон социјално добро и создавање почиста и поздрава иднина за сите нас“, рече Вања Манова, менаџер во Mastercard за Бугарија, Македонија, Албанија и Косово.

Инаку, како прва еко банка во нашата држава, Халкбанк во последните осум години има финансирано повеќе од 6.000 еко проекти во износ од 36,6 милиони евра. Со тоа, емисијата на јаглероден диоксид досега е намалена за најмалку 37 илјади тони годишно, а со истите проекти се заштедени 130.000 MW/h електрична енергија. Како дел од еко заложбата на банката е воведена и ХалкЕко платформата којашто преку мобилната апликација охрабрува физичка активност и формирање на здрави навики кај корисниците, така што на секои реализирани 80 километри пешачење, трчање или возење велосипед или тротинет, како кумулативна физичка активност на сите лица што ја користат апликацијата, Халкбанк засадува по едно дрво. Преку неа од нејзиното лансирање во октомври 2019 досега се засадени вкупно 6.252 дрвја, а емисијата на CO2 е намалена за над 54.931 кг.

Mastercard е глобална технолошка компанија во индустријата за плаќања. Нивната мисија е да поврзат и обезбедат инклузивна дигитална економија од која ќе имаат корист сите и насекаде, правејќи ги трансакциите безбедни, едноставни, паметни и лесно достапни. Користејќи безбедни податоци и мрежи, партнерства и страст, нивните иновации и решенија им помагаат на поединците, финансиските институции, владите и бизнисите да го реализираат својот најголем потенцијал. Нивната мерна единица за пристојност или DQ (Decency Quotient), ја поттикнува корпоративната култура на Mastercard и сè што тие прават внатре и надвор од компанијата. Со врски низ повеќе од 210 земји и територии, тие градат одржлив свет кој отклучува бесценети можности за сите.