Хрватска меѓу три земји во ЕУ со најголем пад на индустриското производство

6

Во ноември 2020 година, Хрватска беше меѓу трите земји на ЕУ со најголем пад на индустриското производство на месечно ниво, додека во ЕУ и еврозоната, растот на производството малку се забрза, покажа извештајот на Европскиот завод за статистика.

Во Европската унија со 27 земји, сезонското прилагодено индустриско производство се зголеми за 2,3% во ноември во однос на претходниот месец, кога според ревидираните податоци на Евростат, тоa порасна за 2%. Во еврозоната производството порасна за 2,5% во однос на октомври кога беше во плус за 2,3%.

Производството на капитални производи најмногу се зголеми во обете области, за 6,1% во ЕУ и за 7% во еврозоната. Енергетскиот сектор забележа најголем пад на производството, за 2,9% во ЕУ и за 3,9% во еврозоната.

Меѓу земјите на ЕУ чии податоци ги имаше на располагање Евростат, најголем раст на производството во ноември е забележан во Ирска, за дури 52,8% што е прелиминарен податок и може да биде поврзано со сезонско прилагодување, забележуваат статистичарите. Следат Грција и Данска со месечен раст од 6,3% односно 5,3%.

Производството падна најмногу во Португалија, за 5,1% во споредба со октомври. Следува Белгија со пад на производството од 3,5%.

Во групата земји со најизразен пад на производството во ноември на месечно ниво, Евростат ја издвои Хрватска, која според сезонски прилагодените податоци бележи пад од 2,6% во споредба со октомври кога порасна за 1,7%. Падот во ноември е најголем од април кога производството потона за 7,8%, бидејќи стапија во сила строгите мерки на затворање за да се запре ширењето на инфекцијата со коронавирус, пренесува СЕЕбиз.

Фото: Pixabay