Економијата на еврозоната веќе некое време е на работ на рецесија, но конечно се појавуваат првите знаци на закрепнување. Намалувањето на клучните каматни стапки од страна на Европската централна банка се очекува да го поттикне растот, иако тоа веројатно ќе биде бавно.
Хрватска постигна побрз раст на БДП благодарение на фондовите на ЕУ и јавните инвестиции, додека потрошувачката и извозот на услуги се очекува да продолжат да растат, пренесува Seebiz.
Очекувањата на деловниот сектор се нешто подобри, а донекаде закрепнуваат услугите и личната потрошувачка, кои беа погодени од зголемената инфлација. Инфлацијата сега се намалува, иако платите пораснаа, па има благ оптимизам. Ако БДП на еврозоната наскоро почне да расте, тоа ќе биде добро и за хрватската економија.
Фондовите на ЕУ и јавните инвестиции, заедно со личната потрошувачка, беа најголемите двигатели на хрватскиот раст минатата година, кој сепак е многу побрз од просекот во еврозоната. Последната проекција на ЕЦБ за оваа година за еврозоната предвидува раст од 0,6 отсто во еврозоната, додека според гувернерот на Хрватската народна банка Борис Вујчиќ, прогнозата за раст на Хрватска ќе биде 3,2 отсто.
Фондовите на ЕУ дојдоа во Хрватска во вистинско време бидејќи нивниот придонес во БДП, преку растот на инвестициите, делумно го компензира слабиот раст во еврозоната и падот на странската побарувачка во сегментот на стоковен транспорт. Потрошувачката во Хрватска веројатно ќе остане силен двигател на растот, иако се очекува растот на платите да забави.
