Иако жените во ЕУ се пообразовани од мажите, тие во просек заработувале 14,1 отсто помалку од нивните машки колеги, објавено е во Европскиот мониторинг на работните места издаден од Европската комисија и Еврофонд.
Важно е да се истакне дека ова се податоци за 2019 година и дека не го покажуваат влијанието на пандемијата врз нивото на платите.
Иако резултатите од ова истражување не се задоволителни, сепак постои помал јаз во заработката во однос на претходната деценија – во 2010 година жените заработувале 15,8 отсто помалку. Но, ако јазот продолжи да ја намалува оваа динамика, на Европската унија ќе и требаат повеќе од 70 години за да ги изедначи заработувачките на мажите и жените. Интересно е што овие проценти се во спротивност со нивото на образование, бидејќи жените се генерално пообразовани од мажите во речиси сите европски земји.
Сепак, секоја од европските земји има своја статистика во оваа област. Во некои земји, разликата во платите меѓу мажите и жените е значително помала, а во некои е значително висока. Луксембург, Романија и Италија имаат најмали разлики во заработката меѓу мажите и жените, од пет отсто, додека најголем јаз е забележан во Естонија, Летонија, Австрија и Германија (20 отсто).
Кога како критериум се земаат економските критериуми, најголемата разлика во платите има во финансискиот сектор.
Пензионерките во полоша положба
Како што стареат, положбата на жените постојано се влошува, па покрај тоа што им е потешко да најдат работа доколку им требаат дополнителни приходи, имаат и значително помали пензии од мажите. Според ова истражување, машките пензионери во ЕУ добиваат 29,5 отсто повеќе од жените.