Инвеститорите се загрижени за лошите резултати на американската и кинеската економија

34

На Волстрит ноќта меѓу понеделникот и вторникот по европско време, индексот Dow Jones  благо порасна, додека S&P 500 благо падна, по неизвесното тргување и новите показатели за нагло забавување на кинеската економија.

Dow Jones зајакна 0,08 отсто на 32.223 поени, додека S&P 500 се лизна 0,39 отсто на 4.008 поени, а Nasdaq индексот 1,2 отсто на 11.662 поени.

Силниот скок на тие индекси во петокот ја поттикна надежта за пресвртна точка, постабилно тргување и закрепнување на цените на американските акции, откако S&P 500 загуби околу 16% од јануари, но во понеделникот инвеститорите беа загрижени за послабите од очекуваните економски показатели од Кина.

Прометот во трговијата на мало падна за околу 11 отсто во април во однос на истиот месец минатата година, додека индустриското производство се лизна за речиси три отсто. Ова покажува дека поради строгите мерки за сузбивање на ширењето на корона вирусот, растот нагло е забавен. Сепак, поддршката на пазарот ја обезбедува надежта за нови стимулации од кинеските власти и веста дека некои градови, како Шангај, најавуваат постепено укинување на рестриктивните мерки.

Заострувањето на монетарната политика на американската централна банка најмногу се дискутира на пазарот. Згора на тоа, во понеделникот беше објавено дека индустриската активност во државата Њујорк драстично падна по трет пат оваа година во мај поради падот на новите нарачки и испораки.

Покрај тоа, инвеститорите се загрижени за војната во Украина, прекините во синџирите на снабдување и затворањето на голем број кинески градови поради пандемијата, што може дополнително да го забави растот на глобалната економија.