Италија остана единствената членка на групата ОЕЦД во која куповната моќ на постојано вработените се намали во просек во последните три децении – за речиси три проценти. За споредба, во Франција порасна за 31 отсто, во Германија 34 отсто, а во Словенија 69 отсто.
И покрај навидум оптимизмот на владата на Џорџа Мелони, не се чини дека ситуацијата ќе се подобри на краток рок. На ова укажуваат податоците за високиот буџетски дефицит и повторно понискиот економски раст.
Пресметките на државниот завод за статистика Истат сè уште не се конечни, но јасно е дека италијанскиот буџетски дефицит лани изнесувал околу 7,2 отсто од бруто домашниот производ. Трендот ќе се намали годинава и следните години – но Италија нема да ја достигне максималната дозволена граница од три проценти предвидена со Европскиот пакт за стабилност пред 2026 година, пишува РТВ Словенија.
Затоа, министерот за финансии Џанкарло Џорџети очекува Брисел да покрене постапка против Италија оваа година поради прекумерните дефицити, „што ќе се случи и со некои други земји“, рече тој. Во средината на следната недела Џорџети ќе го претстави т.н документ за економија и финансии кој ги содржи макроекономските планови на Владата за следните три години.
